23 abr. 2018

Ler a paisaxe

Pois iso foi o que fixemos hoxe: un percorrido guiado pola contorna, aproveitando a presenza de Ramón Vila, técnico de cultura do concello, que nos ensinou a ler entre liñas a beleza da paisaxe.
Ao principio custounos... e non só polo mar de néboa...

Pero logo foi mellorando a cousa, e resultou que o territorio do proxecto de Xeoparque Courel Mountains era toda unha novela de aventuras xeolóxicas, un poema de pedra e auga, e unha epopeia humana para habitalo. 
Moitas grazas a todas e todos por virdes ler hoxe estas páxinas da memoria dos tempos.





12 abr. 2018

Abril, abril... libros mil!

Xa comezou unha nova edición de Abril de libros, maio de letras!!!
Polo de agora, estamos montando unha biblioteca interactiva no corredor da planta baixa, elaborando fichas de autoras do ámbito francófono e carteis cinematográficos; estas dúas últimas propostas, do Dpto de Francés e do Dpto de Plástica, respectivamente. Dá gusto colaborar en proxectos tan chulos.
Proximamente, o alumnado do Club de Lectura irá ler aos coles da contorna, esperamos que con tanto éxito como o ano pasado. 
Do concurso de "Respostas para Rosalía" quedaron gañadores: Aimar de 1º da ESO e Zaida de 3º da ESO. As dúas propostas, unha de creación propia e outra cos versos da propia autora, eran perfectas para dar resposta ao verso "E ben, para que escribo?", da autora galega máis coñecida:
Para entrar nos soños do pobo
e que soñen con estrelas
para xogar con sombras
agasallar con palabras
e criar pombas.
(Aimar Álvarez)
"Que así mo pediron,
que así mo mandaron,
que cante e que cante
na lengua que eu falo."
(Zaida Alves, versos de Rosalía)

E aínda que non demos conta polo miúdo del, tamén houbo este ano o xa tradicional concurso de Disfraces Literarios. Cara ao 8 de marzo montamos a exposición de materiais de lectura en relación coas mulleres, pero tamén temos outra en homenaxe a Forges (Defensa de la Lectura).

E para pechar o 2º trimestre, As aureanas viñeron representar unha versión de Las literatas de Rosalía. Foi un éxito. Moitas grazas a tod@s, especialmente á directora, Eva F. Ferreira e ás dúas "participantes" do noso centro: Luisa, profe de galego, e Ariadna, alumna de 4º da ESO.
Había máis membros da comunidade escolar no escenario... algunha nai, por exemplo.
Grazas a todas, por traer á Rosalía reivindicativa e feminista para pechar o mes de marzo.






6 feb. 2018

Un paseo entre viñetas e outras novas

Deu de si, a presenza de Manel Cráneo o día 30 de xaneiro: ademais do obradoiro de ilustración para o alumnado de 3º e 4º da ESO, tivo tempo para saudar á rapazada do Club de Lectura e para xantar coa sección de adultos de Libromanía -iso teredes que velo no blog de Libromanía...


Xa está de novo en activo "O Eco do Val" en Escola de Prensa. Na páxina web do centro podedes consultar os artigos do noso alumnado. 

30 ene. 2018

Viñetas pola paz e obradoiro de ilustración... hum...

Como xa sabedes, hoxe conmemórase o Día da Paz; no IES de Quiroga, ademais celebramos, ao igual que se veu facendo os últimos anos, o Día da Ilustración.
Para iso teremos hoxe obradoiro de Manel Cráneo "Un paseo entre viñetas", por unha parte, e a proposta "Viñetas pola paz", por outra.
Tamén lembramos a Camilo Díaz Baliño

18 ene. 2018

Dúas grandes novas

A primeira: xa están publicadas as bases do Concurso de Disfraces Literarios que organiza a biblioteca, por terceiro ano (ide buscando as vosas personaxes e os vosos autores de referencia!).
A segunda: como saberedes, saímos no telexornal! A presentación da nosa edición de Las medias rojas na RAG, non merecía menos.


29 dic. 2017

As "nosas" publicacións

Ademais do habitual biblioletín (onde se da conta das últimas actividades e adquisicións da biblioteca e se propoñen lecturas para o Nadal), nestas datas temos outra publicación, feita en colaboración coa Casa Museo de Emilia Pardo Bazán: a versión ilustrada polo noso alumnado de "Las medias rojas".
Aproveitamos a saída do día 21 á Coruña (coa visita á exposición "A arte do cómic" e ao MAC) para presentar, no salón de actos da RAG, este caderno onde a palabra da autora coruñesa se fixo debuxo.
Grazas a todos e todas @s implicad@s en facer realidade estas páxinas!

Váisenos o 2017...

Como se nos foi o tempo este outono...
Queda aquí un pequeno recordatorio visual dalgunhas propostas da biblioteca neste trimestre que non debullamos máis polo miúdo noutra entrada:
- a mediados de outubro, conmemoramos o Día das Escritoras: o alumnado de 3º da ESO elaborou un mural sobre autoras inglesas contemporáneas, coa colaboración de Nelson, o seu titor e profesor de inglés:
- coincidindo coa celebración do magosto, o 10 de novembro, houbo lecturas "de outono"
- ao longo do mes de novembro montouse a exposición "A viaxe da ciencia" no corredor da planta baixa; dende mediados de outubro, no Departamento de Bioloxía xa se podía visitar unha sección expecífica sobre publicacións científicas antigas: exerceu de guía por esa parte da viaxe, o xefe deste departamento, José Espinosa.
- a finais de outubro a nosa exposición sobre Maruja Mallo comezou tamén unha aventura viaxeira, xa que lla emprestamos á biblioteca da EOI de Lugo: onde non chegamos, mandamos recado!