As "nosas" publicacións

Ademais do habitual biblioletín (onde se da conta das últimas actividades e adquisicións da biblioteca e se propoñen lecturas para o Nadal), nestas datas temos outra publicación, feita en colaboración coa Casa Museo de Emilia Pardo Bazán: a versión ilustrada polo noso alumnado de "Las medias rojas".

Aproveitamos a saída do día 21 á Coruña (coa visita á exposición "A arte do cómic" e ao MAC) para presentar, no salón de actos da RAG, este caderno onde a palabra da autora coruñesa se fixo debuxo.

Grazas a todos e todas @s implicad@s en facer realidade estas páxinas!

Váisenos o 2017...

Como se nos foi o tempo este outono...
Queda aquí un pequeno recordatorio visual dalgunhas propostas da biblioteca neste trimestre que non debullamos máis polo miúdo noutra entrada:

- a mediados de outubro, conmemoramos o Día das Escritoras: o alumnado de 3º da ESO elaborou un mural sobre autoras inglesas contemporáneas, coa colaboración de Nelson, o seu titor e profesor de inglés:

- coincidindo coa celebración do magosto, o 10 de novembro, houbo lecturas "de outono"
- ao longo do mes de novembro montouse a exposición "A viaxe da ciencia" no corredor da planta baixa; dende mediados de outubro, no Departamento de Bioloxía xa se podía visitar unha sección expecífica sobre publicacións científicas antigas: exerceu de guía por esa parte da viaxe, o xefe deste departamento, José Espinosa.
- a finais de outubro a nosa exposición sobre Maruja Mallo comezou tamén unha aventura viaxeira, xa que lla emprestamos á biblioteca da EOI de Lugo: onde non chegamos, mandamos recado!

DE MEDO!!!

Pois si, así foi a xornada... non hai máis que a escenografía de Biblioquiroga hoxe, onde o alumnado de ESO e 1º de BAC fixo seu o Samaín lendo contos de medo.

Tamén fixemos oco para amosar na biblioteca unha selección de lecturas en relación co terror...

Non esquezades que estades a tempo para participar no concurso de microrrelatos de terror. O de decoración de cabazas aínda non ten gañador, animádevos!!!

A festa grande da biblioteca

Atención:

Hoxe conmemoramos por terceiro ano consecutivo o Día das Bibliotecas Escolares, de novo combinando música e palabras. Nesta ocasión estará con nós Xurxo Souto. 

O músico e escritor de Monte Alto visítanos para falar da historia do rock galego, da que forma parte como membro de Os Diplomáticos, un dos grupos máis representativos do Rock Bravú.

Ademais de himnos contemporáneos como "Gaiteiro" ou "Oda ao futbolín", puxeron música a poemas de Manuel María ou Celso Emilio Ferreiro e colaboraron con outros intérpretes e músicos como Mercedes Peón (Nordés).

Poñede ben a orella, amantes da música e dos libros!

Letras de Quiroga

O pasado 1 de agosto conmemorouse o Día da Galiza Mártir cunha serie de actos en Poio e Pontevedra. Este ano o premio homónimo recaeu no quirogués Xosé Estévez, residente en Euskal Herría e colaborador en numerosas iniciativas culturais na nosa comarca. Ese mesmo día recibiu tamén o Premio Manuel Murguía ao seu labor como historiador. 

É unha honra ter como membros honoríficos do noso club de lectura a Xosé e a súa dona, Maribel.
Aquí queda a imaxe da entrega do premio, da man Amalia Bóveda, e coa presenza do presidente da Fundación Alexandre Bóveda, Uxío-Breogán Diéguez.

Tempo de Manuel Valcárcel

O martes 30 de maio algúns alumnos e alumnas do IES de Quiroga puxemos rumbo a Monforte para ver unha proxección sobre un lugar próximo a nós: o Courel. A obra chamábase "Tempo" e abordaba distintos aspectos deste espazo xeográfico. Ao chegar a Monforte, xusto antes de ver o documental, o autor, Manuel Valcárcel, explicounos como chegara a gravar esta peza e o que o motivou a facelo. 

Un dos temas principais é o despoboamento e o envellecemento da poboación; en relación co anterior, facía referencia ao nacemento dunha nena en Froxán, o primeiro bebé nado alí en trinta anos.

"Tempo" tamén mostra os problemas medioambientais, e fala de actividades que prexudican o medio e aos traballadores que as realizan; as minas destrúen paisaxes e fan dano á poboación da zona (mesmo se vían exemplos concretos de enfermidade, como a silicose).

Outras informacións que aparecían tiñan que ver coas condicións de vida na actualidade no Courel.

Esta actividade resultou moi interesante porque a compartimos co alumnado do CPI Poeta Uxío Novoneyra do Courel e algunhas familias que se achegaron a velo. 

Rubén López (3º da ESO) e Suso Manteiga

Deixamos aquí un enlace a un fragmento deste documental. Non deixedes de velo.

Traballo ben feito... e recoñecido

Pois ben, a xeira deste ano de Escola de Prensa xa deu nome aos centros gañadores. Dende aquí felicitámolos a todos: ao CEIP Laverde Ruiz de Outeiro de Rei e ao CEIP Monseivane de Vilalba, na categoría de 5º e 6º de Primaria; ao CPR María Auxiliadora de Lugo, na categoría de 1º e 2º da ESO, e moi especialmente ao IES de Perdouro (Burela), un dos nosos rivais na categoría de 3º e 4º da ESO. Tamén van os nosos parabéns para outros centros con galardóns varios, e en xeral, para todos os participantes, que compartiron traballo e ilusións con nós.

Proximamente enlazaremos dende este blog o periódico que fixemos o equipo "O Eco do Val" do IES de Quiroga, que mereceu o premio á mellor contraportada; a nosa tarefa periodística tivo moito éxito na rede, onde se colgaron moitos artigos, e de calidade (como recoñeceu El Progreso na súa edición de hoxe, onde se informaba do fallo desta convocatoria).

O periodo que se aveciña parece un bo momento para ler o xornal, amodiño, sen présas...

Artistas finalistas

Este ano a Casa Museo Manuel María lanzou a primeira convocatoria do Concurso de Videopoemas. Biblioquiroga animou ao alumnado a participar... e houbo quen o fixo, e ben.

Un dos videopoemas enviados quedou finalista: o que fixeron Marta Campos e Sara Casanova, de 1º de BAC a partir dos versos de "Quiroga, fáloche a ti..." de Manuel María.

Aló acudiron o día 20 de maio a Outeiro de Rei, á Casa de Hortas, e aínda que non resultaron gañadoras, foi unha xornada que non esqueceremos. 

A verdade é que a calidade dos traballos que chegaron á final era enorme, e sempre é unha honra estar entre os seleccionados.
Para o ano volvemos, ou?

Quirogues@s na visita posterior ao Museo

Foto das finalistas presentes na entrega de premios

Sara e Marta ante a Casa Museo

(podedes ver o seu videopoema no noso facebook)

E fóisenos maio...

Outro mes de libros e lecturas que remata...
Pero tamén de escrita: o alumnado de 3º e 4º da ESO, que participaba na proposta Escola de Prensa do xornal lucense El Progreso, conseguiu rematar os seus artigos para enviar a tempo o periódico que elaboraron este curso; houbo que botarlles un cabo coa maquetación, que este é un mes moi duro para os/as estudantes....
E mentres, seguiron saíndo artigos feitos por esta rapazada na páxina web habilitada para colgalos (os dous últimos foron sobre a excursión de relixión e sobre a tradición musical desta comarca), e algúns tamén na edición impresa do devandito xornal, na sección dos sábados. Aquí quedan dous exemplos:

Xa estamos en abril... de letras!!!!

Pois si, xa estamos outro ano en abril, comezando coas propostas de "Abril de libros, maio de letras".

Polo de agora andamos quentando motores, coa exposición sobre Maruja Mallo, á pintora viveirense a quen se lle adicou este ano o Día das Artes, e co "fotocall" de Castelao e Rosalía. Aquí queda a foto das que encetaron a sesión de fotos, Nuria e Icía, de 1º da ESO, do Club de Lectura:

A que estades esperando para vir tirar unha foto neste recuncho de clásicos galegos?

Non dicimos nada, pero vaia...

Causas alleas á nosa vontade (exceso de traballo, fundamentalmente) fan que non levemos un tempo sen encher este espazo na rede, pero non por iso deixou de haber actividade derivada da biblio. Máis ben ao revés: ademais da presenza de Xosé Tomás para conmemorar o Día da Ilustración, que xa vos anticipamos aquí, o 17 de febreiro estivo con nós Aldaolado; o 24 de febreiro conmemoramos o Día de Rosalía cun concurso de marcapáxinas e coa creación de caligramas, como os últimos anos; ese mesmo día, houbo un concurso de disfraces literarios; o 13 de marzo tivemos a proposta Feminino Plural, con Silvia Penide e Carla López, e así celebramos este ano o Día da Muller.

En colaboración co Departamento de Plástica, fixéronse dúas actividades: decorouse unha nova porta do centro coa figura dunha escritora neste caso (xa colgaremos imaxe) e, no primeiro trimestre, ilustrouse un conto de Emilia Pardo Bazán (contámosvolo agora, que está a punto de saír a publicación, feita pola propia Casa Museo da autora).

Todo isto e moitas outras actividades que tiveron lugar no centro quedaron reseñadas polo alumnado (equipo "O Eco do Val") en artigos que elaboraron para Escola de Prensa, unha proposta do diario El Progreso. Podedes acceder a varios deles na rede, pois foron colgados na páxina web que hai a tal efecto. Algún mesmo saíu na edición impresa deste xornal (foi o caso de "Aldaolado no IES de Quiroga", o sábado pasado).

Agora vén a temporada forte con "Abril de libros, maio de letras": a ver se damos sacado tempo para contarvos...

Somos de cómic, de novo

Aquí está unha imaxe da nosa visita á exposición "BDG70: a revolta do cómic galego", da que nunsdías poderedes ler unha reseña en Escola de Prensa. Como podedes ver, o noso guía foi Manel Cráneo!!!

Este ano ao debuxante convidado para conmemorar o Día da Ilustración é Xosé Tomás, que estará mañá no noso centro, para dar unha charla e un obradoiro ao noso alumnado. Xa vos contaremos...

Houbo que adiar un pouco a data prevista inicialmente (o día 30 de xaneiro), pero a actividade promete. Xosé Tomás non só ilustra textos de outros autores/as, ten obras propias. Estas son as portadas dalgunhas delas.

Representación teatral para rematar o Ano Manuel María

Rematar o ano cunha versión teatralizada dos Sonetos ao Val de Quiroga, de Manuel María era o tal despois de toda a xeira que se desenvolveu no noso instituto ao redor da figura do autor homenaxeado no 2016 co Día das Letras. A posibilidade chegou da man dun grupiño de afeccionados.

 Aquí os tedes nun momento da representación, descansando da andaina polo Val e ollando a paisaxe mentres recitaban as composicións poéticas que falaban deses lugares...

Por certo, este é o enlace para ver o biblioletín deste trimestre: cheíño de propostas e cunha pequena reportaxe sobre a relación entre a música e a literatura.